بيومي وشاهيناز

المشهد نهار خارجى مكان يشبه القهوة البلدى مكتوب عليه
( قهوة و كوفى شوب المعلم شحاتة ابو دقه)
على ترابيزة متطرفة قاعدين أثنين ابطال قصتنا( بيومى و شاهيناز ) يستمتعان بالأصوات الرومانسية المغردة لبياع الترمس و أصوات الحمير التى تجر عربيات الكارو فى الشارع و أصوات فرقعة الدومونو و الطاولة التى لا تختلف كثيراً عن أصوات القنابل ناهيك عن الأيقاع المتناغم الصادر من السمكرى المجاور للكوفى شوب
من الأخر المنظر عاطفى عاطفى عاطفى لأبعد حد













بيومى : وحشتينى
شاهيناز: انت اكتر
بيومى (يلاحظ ان ايديها مربوطة)انتى اكتر ايه ده مال ايدك ؟؟
(متسلبطة عشان يمسك ايديها)
شاهيناز: (سايبة ايديها و عاملة عبده العبيط) اصلى كنت بعمل صنية بطاطس امبارح و اتحرقت
بيومى :ايدك؟
شاهيناز: الاتنين ايدى و البطاطس بس الحمد لله انا ايدى كويسة انما صينية البطاطس ماتت محروقه و ماما زعقتلى و قالتلى انتى مش هتعمرى بيت و مينفعش كدة
بيومى :ولا يهمك لما نتجوز مش هخليكى تعملى حاجة

شاهيناز:بجد يا بيومى
بيومى :طبعاً و انا مستغنى عنك حد يقول القمر أطبخ بطاطس القمر وظيفته ينور بس
شاهيناز:القمر مستعد يغسل و يطبخ و يكنس لو ده هيخليك مبسوط
بعد سنتين و بعد ماكوفى شوب المعلم شحاتة اتشمعت بالشمع الأحمر و الأخضر و الموف كمان اضطر بيومى و شاهيناز يدخلوا عش الزوجية السعيد بعد ما تسدت كل الغرز قصدى كل السكك فى وشهم و ملقوش مكان يتلموا فيه
ليل داخلى
المشهد بيومى و شاهيناز فى ليلة فرحهم

بيومى :انا مش مصدق نفسى انتى خلاص بقيتى مراتى

شاهيناز:اه يا حبيبى انا كمان مش مصدقه معقولة احنا اتقفل علينا باب واحد
بيومى : و محدش حيفتحه يا روحى بحبك
شاهيناز:بموت فيك

بعد شهر و نص من الجواز
المشهد نهار داخلى /عشة الزوجية

بيومى :بقولك ايه يا شاهى
شاهيناز: ايه؟؟؟
بيومى :انتى مش ملاحظة اننا من يوم ماتجوزنا مكلناش سمك مشوى
شاهيناز:اه صحيح خلاص يا حبيبى انهاردة ان شاء الله هترجع من شغلك تلاقى سمك مشوى على الغدا

نفس النهار الداخلى و نفس المشهدبس بعدها ب 8 ساعات على الغدا

بيومى ينظر الى الاكل فى ذهول (أكنه لقى فيل فى البكونة) ايه ده
شاهيناز:هو ايه اللى ايه ده ؟ مش فاهمة
بيومى :الرز
شاهيناز:ماله؟؟ نى ؟؟
بيومى :لا
شاهيناز: ناقص ملح؟؟
بيومى :لا
شاهيناز:حادق؟؟
بيومى :لا
شاهيناز:امال ايه؟؟؟
بيومى :ابيض؟؟؟

شاهيناز:نعم ؟؟؟؟؟
امال انت عاوزه ايه؟؟كاروهات؟؟؟
بيومى :انتى بتهرجى؟؟ هو السمك بيتاكل برز ابيض؟؟
شاهيناز:امال برز ايه؟؟
بيومى :مسمعتيش عن رز الصيادية؟؟؟
شاهيناز:لا سمعت بس ده مع السمك المقلى
بيومى :والله ده من امتى
شاهيناز:والله انا متربية على كدة طول عمرنا بناكل السمك المشوى برز ابيض و المقلى بصيادية
و تبدأ الصدمة الثقافية الحضارية المتحجرة داخل قوقعة اللا وجود المحورى لطرق طبخ الطعام المختلفة للأتنين تظهر



بعد 3 سنين
المشهد ليل داخلى /حجرة المعيشة امام التليفزيون

بيومى :هاتلناالقناه التانيه عشان الماتش
شاهيناز:انا عاوزة اتفرج على المسلسل
بيومى :مانتى طول النهارقاعدة متتفرجى فى الاعادة
شاهيناز:اسم الله؟؟؟و انا قاعدة فاضية؟؟؟ مش ورايا هم البيت دنا لسة مخلصة غسيل المواعين من 10 دقايق و بعدين مانت بتتغلب كل مرة و تنكد على امى
بيومى :انتى اللى وشك وحش
شاهيناز:خلاص انزل اتفرج عالماتش عالقهوة عشان تبعد عن وشى الوحش
بعد 10 سنين
ماشاء الله بقى عندهم مرسى و نانسى
التغيرات الناتجة بسبب عوامل التعرية و التغطية و البلا الازرق!!
بيومى ظاهرة التصحر بدأت تجتاح شعره مع تغير ملحوظ فى بنيه الجسم التى اصبحت اشبه بالثلاجة مع ظهورانبعاج عند منطقة البطن فبقى شبه ثلاجه قرعة و حامل كمان
بالنسبة لشاهيناز الحمد لله شعرها موقعش لانه مش عارف يقع اصلا لانه بقى كتله واحدة ضد الوقوع و الكسر و التسريح حتى لما بتستحمى بيفضل ناشف و هذه معجزة فى حد ذاتها اما بالنسبة للجسم فحدث ولا حرج انبوبة بوتجاز ماشية تتمختر بشعرها الغجرى المجنون ابن المجنونه
المشهد ساعة عصرية ولا مغربية كله شبه بعضه مبقتش تفرق و هى قاعدة تذاكر للعيال و حاطة مجموعة من الأسلحه المتنوعة لزوم المذاكرة
( فردة شبشب -مسطرة-عصايا-خرطوم) طبعاً نزع السلاح المستخدم تحدده طبيعة الغلط
شاهيناز:بت عارفة لو كلمة نزلت من على السطر و دينى شوفى و دينى لأعيدلك الواجب كله و حتضربى
انت يا زفت يا مرسى
(بالمناسبة مرسى مستخبى فى الحمام لان الشهادة فيها كحكة)
ماشى و انت هتقعد طول عمرك فى الحمام اول ماتطلع حتضرب انا قاعدالك النهاردة و اما اشوف بقى
بعد ساعة و كله خلص الواجب و الواد مرسى اضرب العلقة بتاعه الشهادة بيومى افندى راجع من الاوفر تايم بالجرنال و البطيخة

بيومى : يا مدااام الأكل جاهز؟؟
شاهيناز:ربع ساعه هسخن الأكل
بيومى:يعنى انتى مش عارفه معاد رجوعى و انا كنت متجوز عشان افضل جعان برضه؟امال انا اتجوزتك ليه؟
شاهيناز:ليه و انت اتجوزتنى عشان اخدمك و لا ايه؟
بيومى:طبعا احمدى ربنا اصلاً انى اتجوزتك
انت مبتبصيش لنفسك فى المرايه ولا ايه مش بتشوفى الستات شكلها ايه
شاهيناز:ده على أساس انك كريم عبد العزيز و بعدين و انا فاضية؟؟منا ورايا 60 حاجة اهو ابنك جاب كحكة
بيومى:ماهو ربايتك حتى العيال هتخيبى املهم ده كان يوم اسود يوم ماتجوزتك
شاهيناز:ليه الله يرحم ايام الحب دنتا كنت بتيجى فى نص الليل و انت هلكان و تقعد عالقهوة اللى قصاد بيتنا عشان بس تشوفنى من البلاكونه 5 دقايق
بيومى:كنت اعمى و حمار مكنتش فاكر كده كانت السكينه سارقانى
شاهيناز:انت برضه بعد اللى بعمله لا حمد ولا شكرانيه دانت عيشتك تقرف و صابرة و ساكته فالح تبص ع الستات التانية عاملة ايه
طب ياخويا هاتلى زى ماجواز الستات التانية دول بيجبولهم و انا ابقى احلى منهم و ادى العيال دروس بدل منا قاعدة ليل و نهار اذاكرلهم عشان اوفر عليك مصاريف الدروس و يا ريته عاجب

(باقة متنوعة من الشتايم المركبه من كلمتين ... و كلمة منه على كلمة منها قلم منه على قلمين منها طبعاً الباقى معروف....)







و دى نهاية قصة حب بيومى و شاهيناز
السؤال....






ليه الحب اترمى فى مزبلة التاريخ ؟





العيال؟؟




الفقر؟؟




الملل؟؟


عدم تقدير كل واحد لحجم مسئوليات التانى؟؟

طبعاً انا بتكلم عن فئة مش عن الكل يعنى مش كل الناس كدة بس أحب أعرف رأيكم ...
**