بالصور تعلم خجز تذكرة طيرانك من النت

بسم الله الرحمن
الرحيم

والصلاة والسلام
على أشرف الخلق سيدنا محمد صلى الله عليه وسلم

الإخوة الكرام

أحببت أن أعرض
لكم بأسلوب شرح مصور ومبسط إن شاء الله ازاي تقدر بنفسك تحجز تذكرة سفرك على
الإنترنت، تختار تاريخ ووقت سفرك ووجهتك وتختار مكان جلوسك المفضل في الطيارة وحتى
إختيار وجبتك المفضلة كل هذا وأنت في مكانك في البيت، ولا تستنى دورك في مكاتب
الحجز وشركات السياحية ولا غيره وتتحكم بشكل كامل بتذكرتك، توصلك التذكرة على
ايميلك بعد إتمام عملية الحجز، تطبعها وتشيل شنطتك وعلى
المطار.

منظمة الطيران
المدني الكندية وهي المسؤولة عن شركات الطيران في العالم، أصدرت قرار لجميع شركات
الطيران في العالم كله بإنتهاء العمل بالتذاكر الورقية الي عاملة زي الدفتر الصغير
دي الي كنا بنستخدمها زمان، والقرار ده تم تطبيقه من بداية شهر يوليو الفائت وبذلك
إختفت هذه النوعية من التذاكر تماما وأصبحت التذاكر المعتمدة حاليا هي التذاكر
الإلكترونية e-ticket بمعنى انها عبارة عن تذكرة من ورقة واحده عادية فيها كل
بياناتك ورقم رحلتك ومعادها وتاريخها وحتى رقم الكرسي الخاص بك وكل الخدمات التي
طلبتها ستجدها في التذكرة.

فائدة القرار
الجديد لإعتماد التذاكر الإلكترونية: الهدف الرئيسي هو المحافظ على البيئة عن طريق
توفير كمية الورق التي كانت تستخدم في السابق في طباعة التذاكر القديمة والهدف
الثاني هو التسهيل على المسافر بحيث ان قديما لو المسافر فقد تذكرته قبل السفر
بيضطر انه يروح لمكتب الحجز الي حجز منه ويصدر تذكرة تانية بتكاليف تانية لكن
المشكلة دي اتحلت مع التذكرة الإلكترونية حيث يكفي ان تفتح ايميلك بعد أن قمت
بإتمام الحجز وتطبع التذكرة عشرين مرة زي منت عايز وتاخدها معاك وقت سفرك بكل
سهولة.

الدرس ده عن
كيفية حجز تذكرتك بنفسك على خطوط مصر للطيران وسأقوم بإرشادك خطوة بخطوة عبر خطوات
الحجز السهلة جدا حتى على المبتدئ، بس رجاء إستنى شوية على ما جميع الصور تتحمل
وعددها 9 صور علشان تقدر تتابع الشرح بشكل كويس من غير ما يفوتك
حاجة.

*********************
ده شكل الصفحة الرئيسية لموقع مصر
للطيران

[ندعوك للتسجيل في المنتدى أو التعريف بنفسك لمعاينة هذا الرابط]

أول مرة هتدخل
فيها الموقع ده هيطلب منك تختار الدولة (الي انت مقيم فيها حاليا) او بمعنى أدق الي
هتسافر منها، هتفتح القائمة (1) وتختار منها الدولة، هتلاحظ طبعا إن مش كل دول
العالم متاحة يعني على سبيل المثال الي عايش في السعودية هيلاحظ ان السعودية مش
موجودة من ضمن القائمة، في هذه الحالة عليه يختار World
Wide

1- لإختيار
الدولة التي سيتم الإقلاع منها.

2- (المدينة أو
الدولة أو كود المطار) الي انت مسافر منها (محطة الإقلاع) في المثال ده إخترت إني
هسافر من مطار القاهرة، هتلاحظ إنك أول ما تبدأ تكتب أو حرفين من كلمة Cairo ان
قائمة ظهرت تلقائيا بتعرضلك كل المدن المتاحة لمصر للطيران التي تبدأ بأول حرفين Ca
وكل ما تزود عدد حروف الكتابة كلما قلت المدن المعروضة أمامك لحد ما توصل لمدينة
القاهرة Cairo، وإذا معرفتش اسم المدينة او غيره فكل ما عليك إنك تضغط على Find a
City بجانب المستطيل وتختار الدولة وبعد كده تختار المدينة من القائمة وبعد كده
تختار المطار.

3- (المدينة أو الدولة أو كود المطار) الي انت مسافر إليها (محطة
الوصول) في المثال ده إخترت إني هسافر إلى دبي وبرده تقدر تتبع نفس التعليمات الي
فوق في إختيار وجهة السفر.

4- هنا خلي بالك
إنك تختار إذا كانت رحلتك هتكون ذهاب وعودة Round Trip أو ذهاب فقط One Way علشان
طبعا فرق السعر بين حجز تذكرة ذهاب فقط أو ذهاب وعودة فمتنسهاش للأهمية، وفي المثال
بتاعنا إخترت إني هسافر في رحلة ذهاب وعودة.

5- هنا ومن
المستطيل على الجهة اليسرى هختار التاريخ الي هسافر فيه (تاريخ المغادرة من القاهرة
إلى دبي) وذلك عن طريق الضغط على الأيقونة الي عليها دائرة
حمراء.

6- ومن المستطيل
على الجهة اليمنى أيضا هختار تاريخ العودة بتاعي (تاريخ العودة من دبي إلى القاهرة)
بنفس الأسلوب والطريقة.

7- هنا هنختار
الدرجة الي هسافر عليها على متن الطيارة وطبعا كله بتمنه زي تذاكر القطر
كده

First ودي الدرجة الأولى - Business ودي درجة رجال الأعمال - Economy
ودي الدرجة السياحية أو الإقتصادية ودي الي أغلب الناس بتسافر عليها لأنها أقلهم في
السعر وأقلهم أيضا في الخدمات والراحة في كرسي الطائرة (على حسب طرازها طبعا)
وأقلها في الوزن المسموح ليك وأقلها في الترفيه ونوعية الأكل المقدم ليه وخلافه،
وفي مثالنا هنا إخترت إني هسافر على الدرجة السياحية.

8- هنا هحدد عدد
الناس الي هتسافر في الحجز بتاعي، وعايزين نفسهم هنا معلومات
بسيطة:

هتلاحظوا إن
القسم ده متقسم إلى ثلاثة أقسام: ***** بمعنى شخص بالغ عمره من 12 سنة بالظبط أو
أعلى - Child بمعنى طفل عمره من سنتين إلى 11 سنة و 11 شهر بالظبط - Infant بمعنى
طفل رضيع عمره من يوم واحد لحد سنة واحدة و 11 شهر
بالظبط

السبب في التحديد ده إن تذكرة الشخص البالغ تعتبر تذكرة كاملة بسعر معين
على حسب تاريخ وموسم سفرك وتذكرة الطفل الي أقل من 12 سنة بيبقى سعرها نص ثمن تذكرة
الشخص البالغ والطفل الرضيع الي أقل من ستين بتبقى تذكرته تقريبا نص سعر تذكرة
الطفل فمهم إنك تحدد لنظام الحجز عدد وأوضاع الناس المسافرين معاك، وفي مثالنا
إخترت إني مسافر لوحدي كشخص بالغ.

9- أخد نظرة
سريعة على البيانات الي أدخلتها واتأكد من التواريخ ووجهات السفر والدرجة السياحية
الي اخترتها ثم أضغط على زر Show Availability علشان يبدأ يعرض لي جداول الرحلات
حسب إختياراتي السابقة.

*********************

هنا عرض لي
جداول الرحلات الذهاب والعودة في التواريخ إلي انا اخترتها وهي
كالتالي

1- في الجدول ده
هنلاحظ إن ده جدول الرحلات المغادرة Outbound من مطار القاهرة إلى دبي Cairo -
Dubai وهنلاحظ في نفس الجدول ده إن في رحلتين في يوم 11 سبتمبر إلى إخترته مسبقا،
رحلة هتقوم من مطار القاهرة الساعة 9 صباحا بتوقيت القاهرة توصل مطار دبي الساعة 2
ونص ظهرا بتوقيت دبي، الرحلة دي هتستغرق 3 ساعات ونص 3:30 كما هو موضح - الرحلة دي
0Stops بمعنى إنها رحلة مباشرة من القاهرة إلى دبي بدون توقف (ترانزيت) وعلى الدرجة
السياحية الي إخترتها Economy

2- الجدول الي
على اليمين ده بيبين رحلات العودة Return من مطار دبي إلى مطار القاهرة في تاريخ 11
أكتوبر إلي أنا إخترته مسبقا أيضا من البداية وفيه برده نفس البيانات السابقة الي
شرحتها في النقطة رقم (1).

3- بعد ما نختار
مواعيد الرحلات الي تناسبنا حسب رغباتنا من جدول الرحلات المغادرة وحدول رحلات
العودة، هنا موقع الحجز بيدينا خيارين للحجز: الأول هو Lowest Fare بمعنى أرخص سعر
متوفر للحجز والثاني هو Restricted Fare بمعنى حجز بشروط معينة وهشرح الفرق ما بين
الإتنين:

Lowest Fare:
وده الي أغلبنا بنستخدمه ميزته إنه بيحجزلك بأرخص سعر متوفر ولكن بشرط إن مش
مسموحلك تعدل في تاريخ الحجز بتاعك لو حبيت تغير رأيك أو تغير في معاد السفر حتى لو
في نفس اليوم أو إنك تلغي الحجز بتاعك نهائي لو قررت إنك متسافرش لأن لو حبيت تاخد
قرار في أي حالة من الحالات السابقة هتقع عليك غرامة تغيير أو تعديل أو إلغاء الحجز
وده بسبب إنه وفرلك حجز بسعر رخيص ولكن إنت متخسروش بتعديلك أو برفضك للحجز بعد كده
فتعتبر شروط مقيدة.

Restricted
Fare: وده عكس النظام السابق، حجز بسعر أعلى شوية ممكن يوصل ل 500 جنيه تقريبا ولكن
من غير شروط أو قيود، عدل في تاريخ سفرك أو معاده أو ضيف أشخاص تانية مسافرة أو شيل
ناس من على تذكرتك وخلافه مش مشكلة.

طبعا أغلبنا
متأكد من مواعيد سفره ومش ناوي يغير فيها حاجة وبكده هنختار نظام الحجز Lowest
Fare

4- بعد ما نتمم
على إختياراتنا وعلى مواعيد السفر وتاريخه والوقت نضغط على Check Price علشان
يعرضلنا سعر التذكرة حسب الإختيارات بتاعتنا.

*******************

هنا ملخص
للرحلات بتاعتي الي هسافر وأرجع بيها حسب خياراتي
السابقة:

1- رقم الرحلة
بتاعتي الي اقدر اعمل Check بيها على جدول الرحلات وهو في حالتنا هنا رحلة
MS912

2- الدرجة الي
حجزت عليها وهي السياحية Economy

3- الفترة
الزمنية للرحلة من محطة الإقلاع القاهرة - دبي وهي 3 ساعات
ونص

4- نوع وموديل
الطائرة الي هسافر عليها وهي هنا من شركة Airbus الأوروبية موديل الطائرة A330 للي
بيعرف في موديلات الطائرات

5- إجمالي سعر
تذكرة السفر والعودة وهو هنا بمبلغ 3441 جنيه وفي السطر الي قبله عارض لي تفاصيل
سعر تذكرتي بعد ما أضاف الضريبة وخلافه.

6- لو حبيت أقدر
أحول سعر التذكرة من الجنيه المصري لو حبيت مثلا أعرف تساوي قد إيه بالدرهم
الإماراتي أو الدولار الأمريكي عن طريق الضغط على اللينك ده واختار البلد وعملتها
الي عايز أحول ليها.

7- اتأكد إن كل
شيئ تمام حسب إختياراتي اضغط بعدها على زر Traveler
Details

****************

هنا هبدأ أدخل
بياناتي الشخصية كمسافر وهننا ننتبه لنقطة هامة جدا ضروري إننا نكتب البيانات زي
ماهي مكتوبة بالظبط في جواز السفر، يعني الي إسمه Ahmed في جواز سفره يكتبه زي ماهو
ميكتبوش Ahmad علشان ميواجهش مشاكل في المطار

1- دي بيانات
المسافر رقم (1) إلي هو أنا، بما إني المسافر الوحيد Traveler 1 ولو كان في أكتر من
مسافر فهيظهرلي Traveler 2 وهكذا.

2- إختار اللقب:
السيد - السيدة - الدكتور ... إلخ.

3- إسم
العائلة

4- إسمك
الشخصي

5- هتسيبه فاضي
بما إنك مش عضو في نظام EgyptAir Plus

6- الإيميل
الشخصي بتاعك وده مهم علشان ده الي هيتبعتلك عليه تذكرتك بعد ما تخلص إجاراءت الحجز
علشان تقدر تطبعها وتسافر على طول.

7- تليفون المنزل

8- إسمك بالكامل
زي ماهو مكتوب بالظبط في بطاقة الإئتمان الخاصة بيك الي هتستخدمها في
الدفع.

9- رقم تليفونك
مع كود الدولة

10- ضع علامة صح
هنا إذا حبيت إن السيستم يفتكر بياناتك في المرة الجاية لما تيجي تعمل حجز جديد من
خلال الموقع ويوفر عليك كتابة بياناتك من جديد كل
مرة.

11- ضع علامة صح
هنا علشان تقدر تختار مكان الكرسي بتاعك في الطيارة لو تحب تقعد جنب الشباك أو في
الصف الي في منتصف الطائرة بالإضافة لإختيار وجبتك المفضلة وأي خدمات أخرى تحب
تطلبها.

12- ضروري نشيك
على بياناتنا الشخصية بعد كده نضعط على Purchase

*******************

هنا الصفحة الي
هنختار منها الطلبات الإضافية:

1- نضغط على
select seat علشان نختار الكرسي بتاعنا مكانه فين والكرسي الي هنختاره هيتكتب رقمه
(الكود بتاعه) في المربع الصغير الي تحت كلمة select seat (تابع الصورة التالية
لمزيد من الشرح).

2- هنا تختار
نوع الوجبة المفضلة، مثلا وجبة Moslem علشان تضمن إنها متحتويش على لحم خنزير أو
كحوليات، في وجبات أخرى زي مثلا وجبة خاصة بالأطفال لو معاك أطفال، وجبة قليلة
الأملاح للي بيشتكوا من ضغط الدم المرتفع زي أغلب شعب بلدنا، وجبة قليلة
الكوليسترول - وجبة خاصة باليهود - وجبة بحرية سمك وخلافه بس مستبعد يبقى فيها
جمبري طبعا وخلافه (دي خاصة برحلة الذهاب من القاهرة إلى
دبي).

3- نفس النقطة
السابقة ولكن دي التفضيلات الي تحبها بالنسبة لرحلة العودة الخاصة بيك من دبي إلى
القاهرة.

4- أيضا نفس
الإختيارات السابقة المتاحة ولكن لرحلة العودة.

5- دي خاصة
للأشخاص الي محتاجين مساعدة من نوع معين زي الأشخاص المصابين بالصمم أو بالعمى أو
شخص كبير في السن محتاجين مساعدة للصعود على الطائرة أو سيدة حامل محتاجة لمتابعة
ورعاية طبية على الطائرة

6- كله تمام
وظبطت أكلك ومكانك على الطيارة؟ اضغط على Save

********************

الشاشة دي خاصة
بإختيار مكان الكرسي الي عايز احجزه ليا في الطيارة، طبعا دي صورة مخطط للكراسي
المتوفرة:

الكراسي الي
باللون الأبيض دي الشاغرة الغير محجوزة حاليا.

الكراسي باللون
الأزرق دي الي تم حجزها خلاص وغير متاحة لإختيارها.

أقدر هنا أختار
الكرسي الي عايز أحجزه سواء جنب الشباك أو في منتصف الطائرة وخلافه عن طريق الماوس
مجرد أعمل Click على مكان الكرسي المفضل ويظهر لونه باللون
البرتقالي.

1- مخطط للكراسي
المتوفرة على الطائرة.
2- رقم الكرسي الي تم اختياره زي ماهو ظاهر في الصورة
باللون البرتقالي.
3- بعد ما أختار اضغط على زر Save

*********************

هنا صفحة ما قبل
الدفع بإستخدام البطاقة الإئتمانية الخاصة بيك:

1- هنا هتختار
نوع الكارت الخاص بيك اذا كان Visa أو MasterCard

2- هتكتب اسمك
كامل زي ما هو مكتوب بالظبط على بطاقة الإئتمان الخاصة بيك مرة
تانية.

3- هنا هتختار
لو عايز النظام يفتكر إختياراتك السابقة الخاصة بالكرسي وبالوجبة المفضلة ليك في
حالة إجراء حجز جديد من الموقع.

4- لازم هنا
تعمل علامة صح علشان توافق نهائيا على شروط الدفع والسياسة الخاصة بالموقع مش سياسة
بلدنا متخفش.

5- كله تمام؟
اضغط على Payment

******************

الموقع هيحولك
لصفحة خاصة يقوم فيها البنك الأهلي المصري بدور الوسيط في عملية الدفع المشفرة
والآمنة تماما ما بيك البنك الخاص بيك ومابين مصر
للطيران.

1- طبعا بما أني
إخترت ان بطاقتي من نوع Visa مسبقا فهنا هضغط على شعار
Visa

*******************

هنا هتبدأ تكتب
رقم الكارت الخاص بيك بالأسلوب التالي علشان يخصم منه تمن
تذكرتك:

1- هتكتب رقم
الكارت من الشمال لليمين، كل 4 أرقام في خانة وممكن في الخانة الرابعة الأخيرة
تتضمن أربع أرقام أو أكتر على حسب نوع البطاقة الخاصة
بيك.

2- هنا هتكتب
تاريخ إنتهاء بطاقتك الإئتمانية كما هو مكتوب على بطاقتك نفسها: الشهر على الجهة
اليسرى والسنة على الجهة اليمنى.

ملاحظة: السنة
بتتكتب برقمين يعني لو تاريخ إنتهاء بطاقتي في عام 2009 فهكتب آخر رقمين من ناحية
اليمين كدليل على سنة الإنتهاء وهو 09

3- هتكتب الرقم
السري لبطاقتك (مش الي بتستخدمه في السحب الكاش من أجهزة الـ ATM) ولكن الرقم عبارة
آخر ثلاثة أرقام مطبوعة على ظهر الكارت كما هو مبين لك في الصورة في
الموقع.

4- إجمالي
المبلغ الذي سيتم خصمه من بطاقتك.

5- إضغط على Pay
وانتظر لحظات وتظهرلك رسالة إنه تمت عملية الدفع بنجاح يبقى كده مبروك، تقدر على
طول تراجع إيميلك وهتلاقي رسالة من مصر للطيران ببيانات تذكرتك الي على طلو تقدر
تطبعها وتحتفظ بيها لمعاد يوم سفرك.

ختاما:
أرجو أن يكون الشرح مبسط وسهل حاولت أن أجعله يبدو ذلك قدر إستطاعتي والي عنده
استفسار عن اي نقطة يتفضل

**************

تم بحمد
الله

شكرا لكم على الموضوع بارك الله فيكم

شكرا لك
اسعدني مرورك

» برنامج روعه لتسريع النت مجاني ويدعم كل اتصالات النت مجرب وروعه
» القنوات الاسلامية مباشرة على النت
» نصائح للاطفال عند استعمال النت
» كيفية جلب مفتاح الكاسبر أوتوماتيكي من النت
» برنامج روعه للتحميل من النت وعربي