[[ من متى والجريح يطيب عقب الكلام ]]

توك اللحين تدري فالهوى والهيام؟!
يوم جفف ظلام الغدر.. عشق الجفون

جاي تشكي لي الضيقة.. وقل المنام
تحسب إنك إلين اللحين.. خل وتمون!!

جاي بأصدق بداية وأنته أكذب ختام
تحسب إن الخيانة من تعدي.. تهون

من سهر/ يا سهيري.. لا يخاف الظلام
ومن طعن/ يا غريمي.. لا يهاب الطعون

من متى والجريح يطيب عقب «الكلام»؟!
من متى والعيون تحب «دمع العيون»؟!

كف دمعك! ترا توي بديت الملام
ياخي بدري على الدمعات.. توهم يجون؟!

لا تسولف.. ترى هالفرقى تهد العظام
لا تسولف.. تراني صدق.. صدق إمغيون

خل دمعك يسولف.. واذكر الله.. ونام
وحط راسك على «صدر الفراق الحنون»

ان صدفت الهوى قله: (عليك السلام)..
وإن صدفت الحزن قله: (عساها تهون)..

إنت ضيعتني عقب الجفا.. والخصام
وإنت علمتني كيف الخيانة.. تكون

منت قد المسامح/ والوفا/ والغرام
«أنت واجد عليك تحب يوم.. وتخون»


لـلـــشـــــاعــــــر // صــــــلاح الـــعـــــرجــــانــــــي

مشكور على الكلام الجميل

تسلم ايديك على الكلمات الرائعه
بارك الله فيك وننتظر من الجديد